Заң бойынша шетелдіктер ЕЭО-ға кірмейтін елдерде тіркелген автокөлікпен Одақ аумағында бір жыл жүре алады. Бірақ мұндай көлік құралын өзгеге беруге немесе сенімхат арқылы сатуға тыйым салынады және мұндай машинаны шетелден әкелген азамат өзі ғана жүргізуге құқылы. Ал уақытша кіргізу мерзімі аяқталғаннан кейін автомобиль ЕЭО аумағынан шығарылуы керек.
2021 жылы карантинге байланысты уақытша әкелінген көліктердің ЕЭО аумағында қалу мерзімі 30 қыркүйекке дейін ұзартылды. Бірақ аталған күннен кейін де барлық машина бірден елден шығып кеткен жоқ. Мемлекеттік кірістер комитетінің есебінше, 2020 жылдан бері Грузия және Әзірбайжан азаматтары басқарған 4157 автокөлік Қазақстан аумағына кірген, оның 2130-ы уақытша әкелу мерзімі асып кетсе де, біздің елде әлі жүр.
Маңғыстау және Түркістан облысы бойынша мемлекеттік кірістер департаменті 300 көліктің иесін жазаға тартты. Оларға 6.6 млн теңге көлемінде әкімшілік айыппұл салынды.
Кеден қызметкерлері полицияның көмегімен ереже бұзғандарды анықтайды. ҚР ҚМ МКК оларға 15 АЕК көлемінде айыппұл салынып, көлікті кедендік рәсімдеу құнын толық төлеуге міндеттелетінін айтады.
Комментариев: 0