General Motors Ресейден біржола кетеді

Cadillaс-тың Ресейдегі ресми өкілдігінің баспасөз порталында ос елдегі қызметті тоқтату туралы хабарлама пайда болды. Бұл шара «Кадиллак» брендіне ғана емес, Chevrolet-ге де қатысты.

«Коммерсантъ» басылымы таратқан ақпаратқа сүйенсек General Motors концерні бұл шешімді АҚШ-тағы басшылардан хабар келген соң қабылдапты. Қазір компанияға Ресейдегі бизнесін жалғастыру мүмкін емес. GM ресми сатушыларға серіктестік тоқтайтынын ескерткен.

Айта кетерлігі, Chevrolet және Cadillac көліктері мен оларға қажет бөлшек жеткізу санкция салынған кезде-ақ, яғни наурызда тоқтаған. Енді концерн бүкіл қызметкерін жұмыстан босатуды жоспарлап отыр.

Өзбекстанда жасалатын «шевидің» де болашағы бұлыңғыр тартып барады. Өзбекстан мен Қазақстан зауыттарынан шыққан жеңіл көліктерді басқа компания жеткізетін. Қазір жұмыс тоқтап тұр, әрі қарай не болатыны белгісіз. Ол да Ravon-ның күйін кешуі мүмкін, өйткені Ресей нарығы UzAuto үшін аса маңызды экспорттық бағыт болатын.

General Motors-тың көрші елден кетуі Қазақстанға да әсер ететіні анық. Өйткені жергілікті Cadillac дилерлерінің жұмысы Мәскеуден басқарылады.