Geely Galaxy топтамасына M7 кроссовері қосылады

Қытайда Geely компаниясына тиесілі Galaxy суббрендінің модельдер қатарына қосылатын жаңа кроссовердің суреттері пайда болды. M7 индексін алған автомобильдің ұзындығы — 4.78 метр, дөңгелек базасы — 2.78 метр. Өлшемдері Geely Monjaro-мен шамалас.

Жаңа өнімнің сырт келбеті M9-ға ұқсайды. Алдыңғы бөлігінде радиатор торының орнына тұтас панель тұр, ауа өткізгіш бампердің төменгі жағында, фарасы жарықдиодты жолақпен біріккен, LED панель артқы бөлікті бойлай орналасқан. M7 шатыры еңіс келген динамикалық пішінімен ерекшеленеді.

Интерьері Galaxy өнімдеріне тән. Ықшам цифрлық аспаптар панелі жүргізушінің алдына, мультимедиа планшеті ортаға жайғасты. Оның астында шағын физикалық батырмалар блогы және смартфон қоятын екі орын тұр. Біреуі салқындатқышы бар сымсыз қуаттағышпен жабдықталған. Мамандар салонына атмосфералық жарықдиодты жолақ орнатты.

1 / 6

• 
• 
• 
• 
• 
• 

1 / 6

Гибрид күштік құрылымның сипаттамасы белгісіз. Дегенмен ол 110 ат күшіне ие 1.5 литрлік бензинді қозғалтқышқа негізделеді. Жүйе жаңа Aegis Golden Brick батареясымен жабдықталады деген ақпарат бар. Кроссовер электр қуатымен 225 км еңсереді. Жалпы жүріс қоры 1730 шақырымға жетеді. Тұрақты токпен жылдам қуаттау мүмкіндігін алады.

Компания модельдің Қытай нарығына шығатын мерзімін хабарламады. Экспортқа аттана ма, беймәлім. Geely Galaxy жақында Қазақстанға ресми түрде келді. Бізде EX5-тің электрлі және гибрид нұсқасы, бензинді Preface пен Citiray модельдері саудаланады.