GAC үлкен Hyper HL кроссоверін таныстырды

GAC концерні Қытай нарығына Hyper HL атауымен шығатын кроссовердің алғашқы суреттерін жариялады. Ресми тұсаукесері 15 қарашада Гуанчжоудағы көрмеде өтеді.

Тизерлерден паркетниктің сырт келбеті ұстамды болатынын, қырлы артқы тірек пен бірегей жарық техникасын алатынын көруге болады. Сыртындағы тік сызықтар алдындағы жанатын радиатор торы мен артқы бесінші есіктегі көлденең жолақпен үйлеседі.

Ұзындығы 5126 мм болатын Hyper HL-дің дөңгелек базасы — 3008 мм. Көлік үш қатарда жеке орналасқан орындықтары бар 6 орынды нұсқада ғана сатылады. Тыңшылар түсірген суреттерден салон архитектурасының алдыңғы бөлігі Hyper HT кросс-купесінен алынған деген тұжырым жасауға болады. Екі модель де ірі ортаңғы тоннель, қырлы рөл, үлкен ортаңғы дисплей және алдыңғы әйнекке жақын орналасқан шағын аспаптар панелімен жабдықталған.

Hyper HL жасанды интеллектісі бар бағдарламалық жасақтама орнатылған жаңа платформаға негізделген. 800 вольттық архитектураның арқасында аккумуляторды шамамен 12 минутта қуаттауға болады. Күштік құрылым туралы толық ақпарат әзірге жоқ, бірақ кроссовер электрлі және бір немесе екі моторлы гибрид ретінде шығатыны белгілі. Стандарт комплектацияда пневмоаспа болуы мүмкін.

GAC Hyper-дің флагмандық моделі — батареялы SSR купесі. Оның электромоторлары 1224 ат күшін береді, ал алғашқы жүздікті 2 секундтан аз уақытта еңсереді. Hyper SSR-дің дебют кезіндегі бастапқы бағасы 1 286 000 юань (87.6 млн теңге) болғандықтан, жергілікті өндірістегі ең қымбат электрокар атанған.