GAC концерні E8 индекcті минивэнін таныстырып жатыр. Жақында сырт пішінін көрсеткен, енді интерьерінің суретін жариялады. Жаңа өнім бірнеше өзгеше дизайнерлік шешіммен ерекшеленеді.
Жеті орынды GAC E8 салонының құрылымы өзге қытайлық минивэндерге ұқсас, дербес орналасқан үлкен медиажүйе дисплейі мен ірі ортаңғы тоннель ерекше көзге түседі. E8-дің аспаптар панелі ұзын алдыңғы панельмен бірге тұр. Салонда физикалық батырма жоқ десе болады. Беріліс қорабының дәстүрлі селекторы да жоқ: әдеттегі иінтірек орнына ауыстырып-қосқыш батырмасын орнатыпты.
Бұған дейін GAC минивэн интерьері қонақ бөлмеге ұқсайтынын айтқан. Соған сай әрлеу материалы басқаша болады. Бірақ фотодағы E8 салоны қарапайым былғарымен қапталыпты.
Алдымен GAC E8-дің гибрид түрленімі саудаға шығады, оның күштік құрылымы екі түрлі бензинді мотордың (133 ат күшіне ие 1.8 литрлік және 140 күшке ие 2 литрлік) біріне негізделеді. Агрегаттың жалпы қуаты қазірше белгісіз. GAC модельдің толық техникалық сипаттамасын кейінірек жариялайды. E8 Қытайда бағасы 330 мың юаньнан (21 млн теңге) басталатын GAC E9-дан бір саты төмен тұрады.
Комментариев: 0