Ferrari клиенттері көлігін ұзақ күтеді

Ferrari басшысы Бенедетто Винья Automotive News Europe өкілімен әңгіме барысында тапсырыс бергендердің саны рекордтық деңгейге жеткенін айтты. Клиент көптігі сонша, қазір тапсырыс берген кісі машинасының кілтін 2026 жылдан ерте алмайды екен.

Ferrari-дің коммерциялық жетістігін тілге тиек еткен топ-менеджер марка тарихында алғаш рет гибрид таңдайтындар көбейгенін атап өтті. Шілде мен қыркүйек аралығында иесіне аттанған 3459 «ферраридің» 51.3 %-ы бензоэлектрлі күштік құрылыммен жабдықталған.

Винья компания алғашқы электромобилін 2025 жылдың IV тоқсанында таныстыратынын растады. Бірақ одан бір жыл бұрын Маранеллода тек «жасыл» көлік шығаратын зауыт іске қосылады.

Жоспар бойынша 2030 жылға қарай конвейерден түскен Ferrari модельдерінің 40 %-ы гибрид болады, толыққанды электромобиль саны да соған теңеседі, демек жалпы өнімнің небәрі 20 %-ын классикалық суперкарлар құрайды.