Қазақстан зауыттары 2024 жылы қанша көлік құрастырды

Қазақстандағы ресми дилерлер былтыр 205 мыңнан аса жаңа автомобиль сатып, алдыңғы жылғы абсолют рекордты жаңартты. Бірақ сауда қызып тұрғанымен, өндіріс ойдағыдай емес. Елде 2023 жылмен салыстырғанда аз машина шықты.

Қазақстан автокөлік одағы Ұлттық статистика бюросының есебіне сүйеніп, 2024 жылы автоөндірушілер 147 131 көлік құрастырғанын хабарлады. Бұл бір жыл бұрынғы өндірістен 2622 дана аз. Бірақ жалпы құн өсті: 2023 жылғы 1.83 трлн теңге болса, 2024 жылы 1.9 трлн теңгеге жетті.

Жергілікті автоөнеркәсіп көбіне жеңіл автомобиль шығарады, былтырғы нәтиже — 133 978 дана. Бұл көрсеткіш 2023 жылғыдан 0.1 % төмен. Жүк көлігі өндірісі — 22.2 % (7705), автобус өндірісі 6.1 % (2942) төмендеді. Сондай-ақ 2141 тіркеме мен жартылай тіркеме және 665 арнайы техника жасалды.

Кәсіпорындар арасында Қостанайдағы Allur тағы көш бастады. Онда 90 515 машина (коммерциялық техниканы қоса алғанда) жасалған, бұл 2023 жылғы көрсеткіштен 0.3 % көп. Алматыдағы Hyundai Trans Kazakhstan 45 410 жеңіл көлік құрастырды (+7.1 %). Үздік үштікті 4271 коммерциялық техника (+12.8 %) жөнелткен СемАЗ түйіндеді.

2024 жыл қорытындысы бойынша елдегі автозауыттар рейтингі

2024 жылы «Қазақстанда жасалған» деген белгісі бар ең танымал бренд Hyundai (45 364) болды, оның кейбірі Өзбекстан мен Қырғызстанға кетті. Екінші және үшінші орында Chevrolet (39 349) мен Kia (24 111) тұр.

Алматыдағы Hyundai Trans Kazakhstan зауыты «Хёндэ» ғана емес, Genesis те өндіреді. Сол үшін зауытта жасалған өнім мен елде шыққан Hyundai автомобильдерінің саны туралы статистикада айырмашылық пайда болып отыр.

Ал модельдер арасында Chevrolet Cobalt жеңімпаз атанды. 33 843 бюджеттік седан конвейерден түскен, бірақ 26 537-сі ғана сатылды. Hyundai Tucson-ның жағдайы керісінше: Алматыдағы зауыт 21 881 кроссовер құрастырса, клиентер 22 389 машина сатып алды. Демек жыл басында дилерлер 2023 жылғы модельдерді саудалаған. ТОП-5 тізімге Kia Sportage (9192), Hyundai Elantra (8022) және Jetour X70 (5259) енді.

Былтыр елімізде автоөндіріс деңгейі төмендегенімен, 2025 жылы өсуі мүмкін. Биыл екі ірі зауыт ашылады. Алматыдағы AMMKZ (Astana Motors Manufacturing Kazakhstan) зауыты 90 мыңнан аса Chery, Changan және Great Wall Motor (Haval, Tank) модельдерін құрастырады. Қостанайдағы жаңа Kia зауыты жылына 70 мың машина жасай алады. Екі кәсіпорын өндірген өнімінің басым бөлігі экспортқа шығады.