Exeed Exlantix ES электроседаны қытайларға ұнамады

Exeed премиум бренді былтыр қарашада жаңа Exlantix ES (жергілікті нарықта Sterra ES) моделіне алдын ала тапсырыс қабылдай бастады. Компания электрокар нарықтағы көшбасшылардың қатарына кіреді деп ойлаған, алайда нәтиже күткендей болмады. Dongchedi басылымы хабарлағандай, алғашқы айдың нақты сауда көлемі болжағаннан бірнеше есе төмен.

Бренд басшылары Sterra ES Қытайда сұранысы жоғары 200-300 мың юань тұратын электромобильдер бестігіне кіруі керек деп мәлімдеген. Басылымның есебі бойынша компания айына кемінде 5 мың көлік сатуы керек. Желтоқсанда 740 седан иесін тапты, ал қаңтарда 500-дей машина өтті.

Біраз уақыт бұрын Exeed 20 мыңнан астам алдын ала тапсырыс қабылдағанын хабарлады. Тапсырыс өндірушінің ойындағыдай рәсімделмей, сауда белсенді болмай жатқан сияқты. Тіпті бағаның төмендеуі электромобильді тартымды етпеді. Басында Sterra ES кем дегенде 260 мың юань (16.2 млн теңге) тұрса, қазір оны 198.8 мың юаньға алуға болады.

Ішкі нарықта Sterra ES бәсекеге қабілеті өте жоғары баға сегментіне кіреді. Дегенмен кейбір жаңа өнім жолын сәтті бастады. Мысалы, 2023 жылдың аяғында пайда болған Zeekr 007 бірінші айда 5 мыңға жуық көлік сатқан.

Компания Sterra топтамасындағы екінші электрокарды (ET кроссовері) жақын арада көрсететіндіктен, жағдай жақсарады деп күтеді. Бірақ ол сегментте де бәсекелес қаптап тұр. Өндірушіге экспорт та көмектесе алады. Мысалы, Ресейде Sterra ES биыл жазда сатыла бастайды. Жаңа өнім Қазақстан нарығына да шығуы мүмкін.