Exeed алғашқы минивэнін шығарады

Бұған дейін тек премиум кроссовер өндіріп жүрген Exeed алғашқы минивэнін шығарады. Марка қазірше модельдің эскизін ғана көрсетті, бірақ AutoHome басылымы кейбір техникалық деталін жариялады. Машина E08 индексті болады.

Сызба дизайнердің жаңа автомобильдің формасын табуға тырысқан алғашқы жұмысына ұқсайды. Бірақ оның ресми жарияланғанын ескерсек, сериялы вэннің сырт пішіні осы суреттегідей болуы мүмкін.
Exeed E08-дің сұлбасы тік желісі бар артқы тірек, ерекше оптика және үлкен радиатор торының арқасында ерекше көрінеді. Минивэн борты ирек қалыппен әрленген.

Exeed E08-дің ұзындығы шамамен 5.2 метр болады деген ақпарат бар. Өлшемі бойынша жаңа өнім Xpeng X9, Voyah Dream, Li Auto Mega сынды модельдерге бәсекелес болады. Вэн бірнеше түрлі күштік құрылыммен жабдықталады деген болжам бар, бірақ олар жайлы қазірше мәлімет жоқ. Exeed кроссоверлері дәстүрлі мотормен немесе гибрид құрылыммен жүреді, марка қазір Sterra (Exlantix) электрлі суббрендін дамытуға күш салып жатыр. Минивэн өз елінде 400 мың юаньнан (24.7 млн теңге) сатылады.