Ford Evos — бес есікті купе тәрізді кроссовер. Компания өндіріске дейінгі үлгіні ғана көрсеткендіктен, оның техникалық сипаттамасы мен күштік құрылымының қуатына қатысты әлі ақпарат жоқ. Дегенмен аспаптар панеліндегі бактағы бензин мөлшерін көрсеткіштің суреті көлікке іштен жанатын қозғалтқыш қойылатынын немесе гибрид екенін аңғартады.
Құрылымдық жағынан Evos тәуелсіз артқы аспа мен алдыңғы жетекке ие «Фокус» шассиіне негізделген. Сондықтан толық жетек опция ретінде ұсынылады. Салондағы үлкен экран Lincoln Zephyr концептісін еске түсіреді. Дәлірек айтқанда көлікте екі экран бар — 12.3 дюймдік аспаптар панелі және мультимедиа кешенінің 27 дюймдік сенсорлы экраны. Сонымен қатар автономды басқару жүйесінің екінші деңгейдегі BlueCruise автопилоты орнатылған. Ол жүргізушіге тас жолда рөлді жіберуге мүмкіндік береді.
Changan Ford бірлескен кәсіпорнында жасалатын Ford Evos биыл жыл соңында сатылымға шығады. Көлік жайлы толық ақпарат соған дейін жарияланады. Ford өз отанында седан шығармайтын болған, келесі жылдан бастап Еуропада да седан өндірісі тоқтайды. Демек оның орнын «Эвос» басады деп болжауға негіз бар. Оның үстіне компания бұл атауды Ұлыбритания, Австралия және Жаңа Зеландияда 2019 жылы тіркеген.
Комментариев: 0