Экология министрлігі экологиялық таза көлік құралы өндірісін ынталандыру ережесіне өзгеріс енгізді. Құжатқа сәйкес автоөндірушілер Қазақстанда жасалған автомобильді сатқан кезде азаматтарға берген жеңілдікті қайтару үшін оператор «Жасыл Даму» акционерлік қоғамына айына екі рет өтінім береді.
Мекеме бұрынғыдай қайта өңдеу үшін өткізген ескі автомобильдің орнына арнайы сертификат береді. Бірақ дисконт қандай болатыны құжатта жазылмаған. Сертификаттың құны мен санын өндірушілердің ұсынысы негізінде Өнеркәсіп министрлігі айқындайды.
Сертификатты бір жыл ішінде пайдалануға болады. Ваучерді үш реттен артық беруге болмайды, сондай-ақ бір машина алу үшін екі сертификаттан артық қолдануға рұқсат жоқ.
Құжат биыл тамыздың аяғында күшіне енеді. Бірақ бұл «Жасыл Даму» сол сәттен бастап көлік қабылдай бастайды дегенді білдірмейді. Қазақстанда ескі автомобильді утилизацияға алу бағдарламасы 2024 жылы желтоқсанда қайта іске қосылуға тиіс еді, бірақ әлі басталған жоқ. Былтыр Экология министрлігі істен шыққан көлік құралын қабылдап, қайта өңдеумен айналысқысы келетін кәсіпкер табылмай жатқанын айтқан. Содан бері бір жылға жуық уақыт өтті, жағдай әлі өзгермеген сияқты.
Жақында өткен Мәжіліс отырыстарының бірінде депутат Әділ Жұбанов Экология және табиғи ресурстар министрі Ерлан Нысанбаевқа бірнеше сауал жолдаған. Ол министрден утиль алым қаражаты неге өз мақсатында жұмсалмай отырғанын, қазіргі утиль алымын пайдалану механизмі қаншалық тиімді екенін және министрлік бұл қаражаттың ашық жұмсалуын қамтамасыз ету үшін қандай шара қабылдап жатқанын сұрады.
Министр утиль алым қаражатын пайдаланудың 14 бағыты бар, негізгілері қалдықты жинау, сұрыптау, қайта өңдеу және утильдеу деп атап өтті. Оның айтуынша ақшаның ашық жұмсалуын қамтамасыз ету үшін жыл сайын тәуелсіз аудит жүреді, «Жасыл Дамудың» ресми сайтында ұйым қызметі туралы жылдық есеп те жарияланып отырады.
«Демек утиль алым қаражаты заңнамада белгіленген бағытта жұмсалып жатыр деп есептейміз. Атқарылған жұмыстың нәтижесі алдағы уақытта белгілі болады», — деді министр.
Комментариев: 0