Бренд жақында Model Y топтамасына тағы бір кроссовер қосады. Америкадағы басылымдар көліктің тыңшылар түсірген суретіне қарап осылай топшылап отыр.
Электрокар компанияның Техастағы гигафабрикасына жақын жерде камераға түсіп қалған. Фотодан марка көлік құнын түсіру үшін ықшам бампер, қарапайым жарық техникасын, дизайны басқаша 18 дюймдік дөңгелек дискісін қойғаны байқалады. Базалық машинаның жүріс бөлігі де бағасына сай болады.
Tesla борт жабдықтарының санын азайтады. Рөл қолмен реттеледі, орындықты баптау мүмкіндігі шектеліп, артқы жолаушылар сенсорлы панель орнына әдеттегі дефлекторды қолданады, салонға жарық беретін құралдар мен аудиожүйе біраз функциядан қағылады, панорамалы шатыр тіпті болмайды. Одан бөлек, жүргізуші көмекшілерінің тізімі өзгереді.
Сайт кодын талдағандар компания көлікті 39 990 долларға бағалайды деп түйген. Бұл расталса, оның құны қазір бәрінен арзан Long Range комплектациясынан небәрі 5000 доллар төмен болады.
Тілшілердің дерегінше Tesla өз отанындағы гигафабрикасында осы саладан хабары бар танымал блогерлер мен инфлюенсерлердің басын қосып, жиын өткізген. Компания оларға жаңа өнімін көрсетті деген болжам бар, соған қарағанда, машинаның тұсаукесері өтетін уақыт таяп қалған сияқты.
Комментариев: 0