Қала әкімдігінің ресми сайты хабарлағандай, Сарыарқа ауданында — 860, «Алматы» ауданында — 325, Байқоңыр ауданында — 107, Есіл ауданында — 388 ақылы автотұрақ алынды. Әкім әлеуметтік және өзге де нысандар маңында орналасқан 55 жердегі ақылы тұрақты жою туралы шешім шығарды.
Бұған дейін елордада ақылы тұрақ санын екі есеге көбейту жоспарланған еді. Шенділер мемлекеттік мекемелер мен ірі кәсіпорындар маңына автотұрақ орнатпақшы болған. Бірақ жергілікті кәсіпкерлер әкімдіктің бұл бастамасын қолдаған жоқ. Кәсіпкерлер палатасы прокуратураға хат жазып, шенділер мен «Астана автотұрақ кеңістігі» ЖШС жеке компаниясының жол жиегіндегі тұрақтан ақша жинау әрекетіне шағымданатынын мәлімдеді.
Алматыда биыл көктемде «Алматы спецтехпаркинг сервис» ЖШС мен Alan Parking ЖШС басшысына қатысты қылмыстық іс қозғалғаннан кейін ақылы тұрақтар қала меншігіне өтті. Шенділер 1 тамызға дейін автотұрақ ақысын жинайтын жаңа оператор құруға уәде берген. Бірақ қала әкімдігі заңды рәсімдерді толық аяқтамағандықтан, ол уәде әлі орындалған жоқ.
Комментариев: 0