Электросамокат, велосипед немесе мопед: қайсысы апатқа жиі түседі

Бас прокуратураның Құқықтық статистика және арнайы есепке алу жөніндегі комитеті «Адамдардың жарақаттануына немесе қаза болуына әкелген жол-көлік оқиғалары туралы» есебін жариялады. Прокурорлар 2026 жылғы 6 айдағы (1 қаңтардан маусымның аяғына дейін) апаттарды талдап, адам зардап шеккен оқиғаның саны 15 188-ге жеткенін, 21 007 адам жарақат алғанын немесе қаза тапқанын анықтады.

Есепте мұндай оқиғалардың көбі елді мекендерде (13 009) болған деп жазылған. Республикалық маңызы бар жолдарда 1328, облыстық жолдарда 478, аудандық жолдарда 266 апат тіркелген. Ауыр апатқа көбінесе жеңіл көлік тізгіндейтіндер (11 842) кәнәлі. Екінші орында автобус (554), үшінші орында жүк көлік жүргізушілері (375) тұр.

Шағын көлік құралдарының арасында мопедшілер (аспалы қозғалтқышы бар велосипед, мокик пен скутер) бірінші орында. Олар 296 апатқа (зардап шеккендер бар) себеп болған. Одан кейін 130 оқиғаға кінәлі велосипедшілер тұр. Жұрт жиі сынға алатын электросамокатшылар (36) үштікті түйіндеді.

Жылдамдықты шамадан тыс арттыру фактісі жол-көлік оқиғаларына ықпал еткен факторлардың арасында үшінші орынға (1780) жайғасты. Бірінші орында — жаяу жүргіншілерге немесе жол қозғалысының өзге қатысушыларына жол бермеу (3876), екінші орында — маневр жасау ережелерін сақтамау (3230).

Әр елуінші жағдайда жүргізуші көлік құралын мас күйде басқарып, жол апатына түскен.