Электросамокат пен мопедке қатысты жол ережесі 18 қыркүйекте күшіне енеді

Ішкі істер министрінің жол ережесіне өзгеріс енгізу туралы бұйрығы кеше жарияланды. Мопед, электросамокат және шағын электрлі көлік құралы жүргізушісінің әрекетін реттейтін түзету 2023 жылы 18 қыркүйекте күшіне енеді.

Сол күннен бастап ереже мынадай болады:

«шағын электрлі көлік құралы — электр қозғалтқышпен жүретін, жеке қозғалысқа арналған бір немесе бірнеше дөңгелегі бар көлік құралы, бұл электромотормен жүретін самокат пен мопедті қамтымайды;

электросамокат — екі не үш дөңгелегі бар, электр қозғалтқышпен жүретін, бір адам ғана тасымалдауға арналған, орындығы жоқ, ең жоғары жылдамдығы сағатына 25 км-ден аспайтын жеке мобильділік құралы».

Бұл ұғымдар бұрын жол ережесінде болмаған.

Kolesa.kz бұған дейін электросамокат жүргізу ережесін толығырақ түсіндірген. Самокатшы жаяу жүргіншілер жолында сағатына 6 км-ден аспайтын жылдамдықпен жүруі қажет және кез келген санаттағы жүргізуші куәлігі болмаса, жолдың жүріс бөлігіне шыға алмайды.

Сондай-ақ мопед, электросамокат және велосипед жүргізушілеріне:

• рөлді кем дегенде бір қолмен ұстамай жүргізуге;
• жолаушы тасуға (жолаушы тасуға арналған арнайы құрылғысы бар велосипед пен мопедті қоспағанда);
• жүк тасуға (жүк тасуға арналған арнайы құрылғысы бар велосипед пен мопедті, сондай-ақ ұзындығы мен ені 50 сантиметрден аспайтын, алып жүргенде қиындық тудырмайтын жүктерді қоспағанда);
• трамвай жолы бар және бір бағыттағы жолақ саны бірден көп жолда солға немесе кері бұрылуға;
• мопед, электросамокат, велосипед сүйреуге (мопед және велосипедпен сүйреуге арналған тіркемені қоспағанда);
• көліктен түспей, жаяу жүргіншілер өткелімен жолды кесіп өтуге;
• қараңғы уақытта өзге көлік жүргізушісіне көрінетін жарық шағылыстыратын зат* тақпай жол бойында жүруге;
• жол бойында шлем тақпай жүруге тыйым салынады.

Мопедші тротуармен ғана емес, веложол және веложолақпен де жүре алмайды.

Шағын электрлі көлік құралы жүргізушісі түнде жарық шағылыстыратын* киім кимесе де болады, бірақ оларға тәуліктің кез келген уақытында жолдың жүріс бөлігіне шығуға тыйым салынады.

*Жол ережесінің 2.18-1 тармағына сәйкес "жарық шағылыстыратын зат — жарық сәулесін шағылыстырып, жүргізушіге қашықтан көрінетін (жақынға түсетін шаммен жүргенде 150 метр, алысқа түсетін шаммен жүргенде 400 метрден) арнайы материалдан жасалған зат (жарық шағылыстыратын киім немесе киімге тағылған зат).