Елде «конструктор»-көліктерді заңдастыру басталды

Он күн бұрын үкімет ЕЭО құрамына кірмейтін елдерден келген автомобильдерді 200 мың теңге төлеп тіркеуге рұқсат берген. Полицейлер құжатта «конструкторлар» туралы сөз болғанын мәлімдеді. Ал өткен аптада оларды заңдастыру алгоритмін жариялады.

Заңдастыру алгоритмі

1-қадам. Онлайн өтініш беру және оны электронды тіркеу («автоконструктор» иелеріне автоматты түрде өтінім мақұлданбағаны және құжаттарды арнайы ХҚКО-дағы ПО (процессингтік орталық) қызметкеріне өткізу керек екені туралы хабарлама жолданады).

2-қадам. ПО қызметкері техникаға тиесілі барлық құжаттың шынайылығын өзі тексереді және «автоконструкторға» толық сәйкес болса, оны электронды тізімге қосады.

3-қадам. Өтінім берген тұрғын тағы онлайн өтініш береді де, электронды тізім бойынша алдын ала тексерістен өтеді және тексеру бекетіне барып, автомобилін криминалист маманға тапсырады.

4-қадам. Одан сәтті өткен соң ХҚКО-ға диагностикалық қарта мен тағы бірнеше құжат өткізіп, 200 мың теңге көлемінде алым төлейді.

Тәртіп сақшылары құрған алгоритм расымен оғаш көрінеді. Бірақ өздері сол дұрыс деп шешкен болар.

Ал «конструктор» иелеріне машинасын заңдастырғаннан кейін тек Қазақстан аумағында жүре алатынын ескертеміз.