Жанармайдың шекті бағасы президенттің пәрменімен қаңтарда белгіленген болатын. 180 күнге жоспарланған шектеу шілдеде күшін жояды. «180 күн өткеннен кейін газ бағасы күрт өспес үшін энергетика министрлігі мемлекеттік кірістер комтитетімен бірге ішкі нарықта сатылатын сұйылтылған газ айналымын қадағалайды», — деді энергетика министрі Болат Ақшолақов. Бүгін мәжіліс мінберінде сөз сөйлеген шенді министрлік «Газ және газбен жабдықтау» туралы заңға енетін түзетулер әзірлегенін айтты.
Министр қазір үкімет жанармай құятын бекеттердегі баға тізімін ғана емес, зауыт ұсынған бағаны да қадағалап отырғанын атап өтті. Қазір отын құны тоннасына 28 мың теңге деп бекітілген. Алайда төмен баға өндірісті дамытуға ынталандыра алмайды, себебі өндірушілер қазір пайда тауып отырған жоқ. Арзан газдың астыртын жолмен экспортталуы да жағдайды қиындатып, салдарынан ел тұрғындары газдан тарығуы мүмкін. Әзірше сұйылтылған мұнай газының ішкі нарықтағы айналымы мен шетелге жіберілуін жедел талдауға министрліктің құзыры жетпейді, бірақ заңға тиісті түзету енгізілсе, бұл салада біршама тәртіп орнайды.
Ведомство басшысы шілдеде келесі 180 күнге отын бағасын шектеу емес, қадағалау енгізу ұсынылғанын хабарлады. Ал 2023 жылдан бастап, яғни заң түзелген соң шекті баға бекітіледі. Алдағы алты айда газ құны сәл көтерілуі мүмкін, бірақ өсім 20 % пайыздан аспайды.
«Егер қазір көгілдір отынның бір тоннасы 28 мың теңге тұрады, енді 36 мың болуы мүмкін. Көтерме бағасы литріне 17 теңгеден 19 теңгеге көтеріледі. Яғни 2 теңге қосылады. Бекеттегі баға бақылауда болады», — деді журналистердің сұрағына жауап берген Ақшолақов.
Дәл осы газдың қымбаттауы батыс өңірдегі жұрттың шеруге шығуына себеп болғанын айта кеткен жөн. Алматы мен басқа қалалардағы тұрғындар да бас көтеріп, арты тәртіпсіздікке ұласқан еді. Қазір ең арзан газ Маңғыстау облысында 45 теңгеден саудаланып жатыр.
Комментариев: 0