Елде алғашқы реверсивті жолдың құрылысы басталды

Тас жолда орташа жөндеу жұмыстары басталды. Жолшылар реверсивті жолақты іске қосуды жоспарлап отыр. Жол 7-ден 11 метрге дейін кеңейеді. Жұмыс аяқталған соң жолақ саны үшеу болады, оның біреуі реверсивті.

Көлік министрлігі хабарлағандай, мұндай схема жолдың өткізу қабілетін арттырып, жүктеме көп түсетін кезде апат қаупін азайтады және аймақ тұрғындары мен туристер үшін жайлы болады. Жазда Зерендінің курорттық аймағын бетке алған көлік ағыны күрт артатындықтан жобаны іске асыру маңызды.

Биыл Қазақстанда республикалық маңызы бар 7 мың шақырым автожол жаңарады. Олардың қатарында Рахман қайнары, Алакөл, Көлсай, Баянауыл, Кендірлі, Қорғалжын қорығы және Имантау-Шалқарға апаратын нысандар бар.

Анықтама ретінде: реверсивті жолақ — қозғалыс бағыты қарсы бағытқа ауысатын жолдар. Жол ережесінде мұндай жолақтар бұрыннан бар, бірақ олар елімізде жөндеу жұмыстары жүріп жатқан көшеде таңғы және кешкі көлік ағынын бөлу қажет болған кезде ғана уақытша қолданылатын.

Мұндай жолда қозғалысты басқару үшін Х тәрізді қызыл сигналды және төмен қарап тұрған нұсқар түріндегі белгісі бар жасыл сигналды реверсивті бағдаршамдар қолданылады. Бұл белгілер көлік қозғалысына тыйым салады немесе рұқсат береді.