Ел тұрғындары көлікті көбіне несиеге алады

Қазақстан қаржыгерлері қауымдастығы 2025 жылдың алғашқы жартысындағы автонесие нарығына шолу жасады. Сарапшылар алты айда автосалондар жүргізген маркетинг кампаниялар, түрлі акция және несие рәсімдеуді жеңілдететін цифрландыру процесінің жеделдеуіне байланысты екінші деңгейлі банктер автомобиль алуға берген несие саны 15.4 % өскенін анықтады.

Осы кезеңде банктер 1.2 трлн теңгеге (+53 %) автонесие берген. Оның жалпы несие сомасындағы үлесі 8.8-ден 13.2 %-ға өсті. Осылайша автонесие автомобиль нарығына оң әсер етіп отыр.

Автокредиттің орташа мөлшерлемесі жарты жылда біршама өсіп, 15.8 %-ға жетті. Бұған базалық мөлшерлеменің жоғарылауы ықпал етті. Бірақ бәсекелестік артып, акция көбейгендіктен, мөлшерлеме 2024 жылғы 19.7 %-дан әлдеқайда түскен.

Сарапшылар елімізде автомобиль бағасы өскендіктен, автонесиесінің орташа сомасы 6.3-тен 6.7 млн теңгеге жоғарылағанын хабарлады. Ал орташа айлық төлем 110.7 мың теңгені құрап, былтырғы көрсеткіштен 8.1 % кеміді.

Алты айда автонесие алуға өтініш бергендердің саны 54 % артып, 2.9 миллионға жеткен. Несиеге өткен автомобиль үлесі 36-дан 59 %-ға жуықтады. Тіркелген машина саны 3% көбейді. Мақұлданған өтінім үлесі 16.2-ден 17.6 %-ға өсті.

Тұрғындар бағасы 5–20 млн теңге аралығындағы машиналарды көптеп алған, бұл барлық автонесиенің 90.6 %-ын (бұрын бұл көрсеткіш 85.7 % болған) құрайды. Уақытында төленбеген қарыз үлесі жыл басындағы 2.8 %-дан 3.4 %-ға өсті.

ҚҚА үшінші тоқсанда автонесиеге сұраныс бұрынғыдай көп болады деп болжап отыр, бірақ несие шарты өзгеруі мүмкін. Кей банк пайыз мөлшерлемесін көтерсе, кейбірі керісінше, талапты жұмсартуға ниетті.