Ел тұрғындары билік заңдастырған көлікті сатуға рұқсат сұрады

Жақында Gosrating.com сайтында заңдастырылған автомобильді сатуға рұқсат беру жөнінде петиция пайда болды. Өтініш авторларының ойынша, бұл тыйым:

• өмірлік жағдай өзгерген кезде (емделу, баспана сатып алу, көшу және т.б. қажеттілік) азаматты өз мүлкін басқару мүмкіндігінен айырады;
• ескі машинасын сатып, орнына заманауи әрі экологиялық таза машина алуына мүмкіндік бермейді;
• «сақтандыру» және «сенімхат» арқылы жасалатын келісімшарт көбейіп, сатып алушының заңды құқықтарын шектейді.

Петиция авторлары мемлекеттен заңдастырылған автомобильді сатуға қойылған шектеуді мерзімінен бұрын алып тастау механизмін әзірлеуді сұрап отыр. Бұл көлік иесінің техникасын заңды түрде ауыстыруына немесе сатуына мүмкіндік береді.

Құжатта Техникалық регламент пен техникалық тексеріс ережесіне өзгеріс енгізіп, стандарт шам орнына LED шам орнатуға рұқсат беру туралы да жазылған. Авторлар мұндай шамға толық тыйым салмай, техбайқау бекетінде сертификаттау және тексеріс жүйесін енгізген жөн деп санайды.

Петиция қарапайым сайтта жарияланған. Ал мемлекеттік органдар назар аудару үшін мұндай өтініш e-Petition порталына шығып, ондаған мың дауыс жинауы қажет. Сол себепті өтініш қараусыз қалуы мүмкін.

2020 жылы Қазақстан билігі Армениядан келген автомобильдерді заңдастырды. Үш жылдан кейін 2022 жылғы 1 қыркүйекке дейін шетелден кірген, тіркелмеген көліктерді жеңілдікпен заңдастырды.