Ұйтқып соққан боран машиналарды бағытынан жаңылыстырып, тіпті Алматы әуежайында тұрған ұшақты қозғап жіберген. Солтүстікте жауған қар жағдайды одан бетер қиындатты. ТЖМ берген мәліметке сүйенсек, 29 наурыз күні Нұр-Сұлтан, Алматы және Алматы облысында алты адам зардап шеккен, оның үшеуі бала.
Кеше елорда мен Ақмола, Ақтөбе, Қарағанды және Қостанай облыстарында құтқарушылар жолда қалып қойған 372 адамды қар құрсауынан шығарды. Құрамында полицейлер, коммуналды мекеме мен жол қызметінің жұмысшылары бар 539 маман мен 277 техника тынбай жұмыс істеді. 80 адам жылы орынға жеткізілген, оның ішінде 11 бала бар. Облыстарда төтенше жағдай салдарын жоюмен айналысатын штаб құрылды.
Жабық жол бөліктерінде жылынатын 40 орын бар. Жұмысшылар жол тазалап жатыр. Әзірше Ақмола, Алматы, Ақтөбе, ШҚО, Қарағанды, СҚО, Қостанай, Павлодар облыстарында 111 жол бөлігі жабық, оның 52-сі республикалық, ал 59-ы облыстық маңызға ие.
Алматы мен Алматы облысында ойран салған күшті жел ағаштарды тамырымен жұлып, ғиараттардың шатыры мен қасбеттегі жапсырмаларды ұшырып жіберді. Ал Атырауда шаңды дауыл тұрды.
Оңтүстік астанада құлаған ағаштар біраз көлікті басып қалды. Шатыр ұшқаны туралы 13 дерек тіркелді, екі ғимараттың қасбеті зақымдалған. Сондай жағдайдың бірі Гагарин даңғылындағы «Дом на Абая» тұрғын үй кешенінде болды. Металл декор үй алдында тұрған машиналар мен жүргін бөлікке түсті. Қаладағы екі тұрақтың қоршауы жұлынып кеткен, сонымен қатар бір трамвай желісі істен шықты.
Бүгін синоптиктер Шымкенттен басқа барлық аймақта дауылды ескерту жариялады.
ҚР ТЖМ тұрғындарға сақтық шараларын сақтауға, төтенше жағдай туындаса 112 нөміріне хабарласуға кеңес береді.
Жабық жолдар туралы ақпарат алу үшін 1403 нөмірі арқылы «ҚазАвтоЖол» ҰК-ның call-орталығына қоңырау шалуға болады, жағдай көрсетілген карта компания сайтында жарияланады. Ауа райы сан құбылып тұрған шақта жолға шықпас бұрын оны кейінге қалдыру мүмкіндігін қарастырған жөн.
Комментариев: 0