Мамырдың 15-інен 16-сына қараған түні жалға берілетін жол талғамайтын көліктің қолды болғаны туралы хабар алған тәртіп сақшылары қала мен облыс аумағында «Тосқауыл жасау» жоспарын жариялайды. Өңірдегі полиция департаментінің баспасөз қызметі хабарлағандай, темір тұлпар Алматы — Бішкек тас жолының 94-шақырымында ұсталып, салонда отырған екі адамды тәртіп сақшылары қоршауға алған.
Тергеу барысында олардың шетел азаматтары екені анықталды. Бірі Ресей азаматтығын алған Өзбекстан тумасы болса, екіншісі — Тәжікстан азаматы. Ұсталғандар Toyota Land Cruiser Prado-ны бір күн бұрын 25 мың долларға қолдан алғандарын айтып ақталған. Ал көлікке тиесілі құжаттың жоқтығын сатушының оны Шымкентте беруге келіскенімен түсіндірді. Күдіктілер Жамбыл облысының Полиция департаментіне жеткізілді, ал мұнда келген автокөліктің иесі оларды бірінші рет көріп тұрғанын және автокөлікті мүлде басқа адамға жалға бергенін айтқан.
Нәтижесінде ұсталған азаматтар да, көлік те Алматыға жеткізілді, енді бұл ұрлық па, әлде алаяқтық әрекет пе, ол жағын полицейлер анықтайды.
Комментариев: 0