2019 жылдың қыркүйегінде Алматыдағы Сүйінбай мен Баянауыл қиылысында Mitsubishi Pajero мен Subaru Legacy қатысқан жол апаты болды. Полицейлер берген ақпаратқа сүйенсек, седан оңтүстік бағытта қозғалып бара жатқан, бағдаршамның сары түсі жанып тұрғанда ол Баянауыл көшесіне бұрылмақ болады. Дәл сол сәтте жол талғамайтын көлік солтүстікке бағыт алыпты. Оның рөліндегі азамат қызыл жанбай тұрып қиылыстан өтіп кетпек болады. Қатты соққыдан бірнеше рет аударылған Pajero тағы бір машинаға соғылады. Апат салдарынан Mitsubishi-де отырған екі әйел жан тапсырды.
Енді, 2020 жылы қарашада полицейлер Facebook-тегі ресми парақшасында осы іске қатысты ақпаратпен бөлісті. Анықталғандай, жүргізушілердің екеуі де кінәлі деп танылып, Қылмыстық кодекстің 345-бабы, 4-бөлігі бойынша бес жылға бас бостандығынан айырылды.
Сот шешіміне қатысты Алматы қалалық полиция департаменті тергеу басқармасының басшысы Олжас Шәріпов түсінік берді.
— Зейінсіздік пен ережені елемеу салдарынан адамдар көз жұмады. Бір жүргізуші сары түске өтіп кетуге асықса, екіншісі қауіпсіздікке көз жеткізбестен маневр жасамақ болды. Нәтижесінде әрекет қайғылы аяқталды. Жол қателікті кешірмейді. Жолда мұқият болып, асықпау керек, — деді Шәріпов.
Осы орайда бұл іске қатысты сот шешімі 2019 жылы қарашада шығып, заңды күшіне енгенін айта кеткен жөн. Тәртіп сақшыларының бұл оқиғаны тек бір жыл өткен соң еске алғаны сұрақ тудырады.
Комментариев: 0