ЕЭО елдерінде пилотсыз көліктердің жүру ережесі бекітіледі

Автопилотты машиналардың біздің көшелерде қашан жаппай жүйткитінін болжау қиын, бірақ заңға олардың қолданысын реттейтін өзгерістер енгізілмек. Кедендік одақ құрамына кіретін барлық елде заңды күші бар «Дөңгелекті көлік құралдарының қауіпсіздігі туралы» КО ТР-нде автоматты басқару жүйесіне ие автокөліктердің қауіпсіздігін мағлұмдау туралы № 24 Ереже пайда болады.

Құжатқа сәйкес, жалпы қолданыстағы жолға шығатын автопилотты, пилотсыз көліктер мынадай әрекеттерді атқара алуы тиіс:

• Арнайы жолақтан ауытқымай қозғалу. Қозғалыс бағытында қарастырылған орындарға не жолаушы талабы бойынша тоқтау.
• Есік жабылғанда және жолаушылар қауіпсіздік белдігін таққан соң ғана қозғалу.
• Жолаушыларға аялдамаға жақындағанда және аялдамаға тоқтап, қайта жүре бастағанда дыбыс арқылы ескерту.
• Апат болған жағдайда «стоп-кран» көмегімен тоқтау.
• Жолаушылар салонындағы адамдардың дыбыстық хабарлама арқылы автономды көлік құралының диспетчеріне хабарласуына мүмкіндік беру.
• Бұрылыстан өтерде жылдамдықты бәсеңдету.
• Көлік жылдамдығының үдеуі не бәсеңдеуі жолаушыларға жайлы болуын қамтамасыз ету.
• Шұғыл тежелу кезінде жолаушыларға дыбыстық белгі арқылы ескерту.
• Ымырт түскенде және қараңғы уақытты қоса алғанда, кез келген уақытта қозғалмайтын және қозғалатын кедергілерді байқау және айналып өту. Айналып өту мүмкін болмаса, автоматты түрде шұғыл тоқтау.
• Ымырт түскенде, қараңғыда және артқы жүріспен маневр жасағанда көліктің қозғалу траекториясын кесіп өтіп бара жатқан жаяу жүргіншілерді байқау. Қағу қаупі туындаған жағдайда, шұғыл тоқтау.
• Ақауларды бекітілген тізімге сай анықтау. Мысалы, аккумулятор батареясының қуаты таусылғанын, дөңгелектің тесілгенін, т.б. анықтап, операторға ақпарат беру және автокөлікті қауіпсіз тежеп, жолаушыларды көліктен шығару.

Одан бөлек, мұндай машиналарды басқаруды жүргізушіден компьютерге беру процедурасы оңай әрі түсінікті болуы тиіс.

Автоматты жүйе рөлді жүргізушіге берер алдында оған берілетін акустикалық, визуалды не тактильді сигналдардың тәртібі көрсетілуі қажет.

Естеріңізге сала кетейік, техникалық регламентке енгізілетін өзгертулер қоғамдық талқылаудан өтті және қазіргі уақытта ЕЭК сарапшылары қарастырып жатыр.