Депутат сақтандыру полисі туралы: тарифті өсіру сақтандырушылардың мүддесін көздейді

7 сәуірден бастап Қазақстанда кей жүргізуші үшін сақтандыру қымбаттады. Елде көлік құралы иесінің азаматтық-құқықтық жауапкершілігін міндетті сақтандыру бойынша сақтандыру сыйақысын белгілеуге арналған «бонус-малус» жүйесінің коэффициентін есептеу мен қолдану ережесіне өзгеріс енді. Бұл жүргізуші куәлігін жаңа алған азаматтар мен жол ережесін жиі бұзатын тұрғындарға ауыр соққы болды.

Жаңа ереже кей депутатқа ұнамай қалды. Бүгін мәжіліс депутаты Елнұр Бейсенбаев ресми сауал жолдап, жаңа тәртіп көлік саласы өкілдерінің пікірін ескермей, оларды қатыстырмай біржақты қабылданғанын айтты. Жаңа ереже Қазақстанда тіркелген 6 миллионға жуық көлік иесіне әсер еткен.

«Мысалы, 2023 жылмен салыстырғанда өңірлерде тариф екі есе өсіп, 78 мың теңге болды. Ал Астанада үш есе артып, 112 мыңға жеткен (жаңа жүргізушілер үшін. — Kolesa.kz ескерт.). Яғни жаңадан көлігін тіркеген елорда тұрғыны енді 36 мың емес, 112 мың теңге төлесе, алматылықтар 78 мың теңгеге, өзге өңір тұрғындары 40 мың теңгеге жуық сомаға полис сатып алады», — деді депутат.

Елнұр Бейсенбаев қаулыда сақтандыру коэффициентіне қатысты азаматтар арасында теңсіздік туғызатын норма бар екенін де атап өтті. Мысалы, елге кірген шетелдік жүргізушіге ең жоғары — 13-класс беріліп, 50 % жеңілдікпен полис рәсімдейді. Алғаш сақтандыру рәсімдеп жатқан Қазақстан азаматы А класы бойынша одан бірнеше есе артық төлейді.

Мәжілісмен жаңа ережеде өңірлер бойынша да дискриминация барын айтты.

«Қаулының 11-тармағында көлік құралы тіркелген аумақтан тыс жерде болған жол апаты үшін «бонус-малус» класы 1-деңгейге түсетіні жазылған. Бұл азаматтардың республика аумағында еркін жүріп-тұруына мүмкіндік беретін конституциялық құқығын (21-бап) шектейді. Еліміздің унитарлы басқару принципіне қарама-қайшы келетін мұндай қисынсыз норманы тиісті мемлекеттік орган қалай қабылдап отыр», — деді Е. Бейсенбаев.

Ол жаңа сақтандыру ережесі мопедшілерге де тиімсіз деп санайды. Бұрын олар полис үшін 7 мың теңге төлесе, енді жаңа жүргізуші ретінде шамамен 50 мың теңге беруге мәжбүр. Бұл мопедтің өз бағасымен шамалас сома.

Мәжілісмен тариф 20–30 % өссе қисынға келер еді, бірден 200 % көтеру орынсыз деді. Оның айтуынша Қаржы нарығын реттеушілердің бұл қаулысы Конституцияға қайшы, сақтандыру компанияларының мүддесін көздейді, сондықтан оны қайта қарау қажет.