Депутат: көлікті бес минуттан артық қыздыруға тыйым салу — ақылға қонбайтын шешім

Нартай Сәрсенғалиев премьер-министрдің орынбасары Роман Склярдың атына жолдаған сауалында аулада автокөлікті бес минуттан артық қыздыруға тыйым салатын заңнамалық норманы қайта қарауды ұсынды.

«Қазір қоғамда қызу талқыланып жатқан автокөлікті бес минуттан артық оталдырып тұруға болмайды деген ақылға томпақ талаптан аттап кете алмаймын. Бұл жиырма жылдан астам уақыт бұрын үкімет бекіткен шешім, бірақ аталған қаулының қате екеніне бәріміздің көзіміз жетіп отыр, қоғам да қатаң сынға алды. Бұл ақылға сыймайтын шешім, себебі сарышұнақ аязда көлікті қыздырмасаң темір тозады, көлік бұзылады, оны жөндеп шығынға бататын баяғы бұқара халық. Бұл турасында бір ғана ұсыныс бар. Автокөлікті бес минуттан артық оталдырып тұруға тыйым салатын министрліктің шешімін дереу өзгерту керек. Әрине, қоршаған ортаны да қорғау керек, бірақ нақты өмірдегі жағдайды да ескеру қажет. Көлік оталып тұрғанынан экологияға зиян келеді дейтін уәкілетті органдар болса, олар алдымен ауаға тонналап зиянды қалдық тастайтын зауыттар мен аспаннан қара қар жаудыратын мекемелерді тәртіпке салып алсын», — деді депутат.

Регламент бойынша депутат сауалына 30 күн ішінде жауап алады. Бұған дейін кейбір аймақта қыс та аяқталып қалады. Дегенмен бұны шектеуді алып тастау немесе жеңілдету жөніндегі алғашқы ресми ұсыныс деп қарастыруға болады.

Аулада қозғалтқыш қосып тұруға (электромобильден басқа) тыйым салатын норма жол ережесінде бұрыннан бар. Оны әлеуметтік желі қолданушылары әр қыста талқылайды. Кейбір жүргізушілер 20–30 минут бойы таңертең ғана емес, түнде де ауаны ластап тұрады. Мұны әсіресе бірінші және екінші қабаттағы тұрғындар қатты сезеді.

Биыл қаңтардың басында мәжілісмен Марат Қожаев көлік қыздыруға салынған айыппұлдың әділдігі туралы пікір білдіріп, норма үлкен қалалардағы таза ауаны сақтау үшін маңызды екенін атап өткен. Оның бұл сөзі жерлестерімізге ұнамады. Қоғамда қызу талқыға түсіп, түрлі түсіндірме айтылды. Кейбір шенеунік норманың тым қатаң екенін мойындап, елдің солтүстігінде қыста көлік қыздыру қиын екенін жеткізді. Ал басқалары экология маңыздырақ екенін алға тартты.

Әділет вице-министрі Ботагөз Жақселекова депутат сауалын алған соң бұл мәселеге байланысты Әкімшілік кодекске түзету енгізу мүмкіндігі қарастырылады деп мәлімдеді. Депутат сауалын жолдады. Күтеміз.