Citroen C3 Aircross Бразилияда сынақтан өте алмады

Latin NCAP ассоциациясы Citroen C3 Aircross кроссоверінің Латын Америкасы мен Кариб аймағында сатылып жатқан нұсқасын краш-тесттен өткізді. Нәтижесінде ассоциация машина рейтингін 0 жұлдызбен бағалап, Stellantis концернінің басшыларына көліктегі кемшілік жайлы өтініш жазды.

Дәстүрлі бетпе-бет соқтығысудан бөлек C3 Aircross-тың артқы жақтан келген соққыдан қорғау мүмкіндігі мен бүйірімен соғылған кездегі қауіпсіздігі сыналды. Сондай-ақ мамандар борттық көмекші жүйелердің қызметін тексерді.

Latin NCAP бағалауы бойынша бюджеттік Citroen-ның ересек жолаушыны қорғау деңгейі — 33 %, жаяу жүргінші қауіпсіздігі — 50 %, қауіпсіздік жүйесінің тиімділігі — 35 %. Кәмелетке толмаған жолаушыны қорғау деңгейі небәрі 11 % болды. Модельдің базалық жинағында екі қауіпсіздік жастығы ғана бар, төмен нәтижеге осы фактор да әсер етті.

Lantin NCAP басшылары Citroen маркасы мен Stellantis концерніне жергілікті нарыққа арналған автомобильдің жабдықталуын жақсартып, базалық жабдықтар тізімін кеңейтуге әрі машина құрылымын жетілдіруге кеңес берді. Концерн Латын Америкасы нарығында ақша үнемдеп отыр деген сынға қалды, өйткені оның бәсекелестері әлдеқайда қауіпсіз машиналар сатып жатыр. Сондай-ақ Үндістанға арналған Citroen C3 Aircross-тың базалық нұсқасы алты қауіпсіздік жастығымен жабдықталған.

Арзан автомобильдің де қауіпсіздік деңгейін толымды етіп жасауға болатынын жақында өткен краш-тест дәлелдеп берген. Global NCAP мамандары Үндістанға арналған жаңа буындағы Suzuki Dzire седанын тексеріп, оның әлеуетін бес жұлдызбен бағалады. Dzire — шамамен 8 мың доллар, ал C3 Aircross 20 мың доллар тұрады.