Мамырда сатылған жаңа көліктердің үздік ондығында өзгеріс болды. Өндірісі Ресеймен байланысты танымал модельдер тұтынушысын жоғалтып жатыр. Бұл жалпы сатылымға да әсер етеді — автосалондар 8295 машина өткізген. Бұл былтыр мамырдағы көрсеткіштен 17.5 %-ға аз, ал биылғы сәуірмен салыстырғанда 10 %-ға төмен.
Екі ай қатарынан көлік сату көрсеткіші төмендеді. Машина тапшы болып, Ресейден автокөлік келмей жатқандықтан 2022 жылы автонарық былтырғыдан 10 %-ға құлдырап кетті.
Танымал модельдер тізімінде тағы да Қостанайда құрастырылған Chevrolet Cobalt көш бастады, седанның 2630 данасы өтті. Егер көлік қолжетімді болса, бұдан да көп өтер еді. Жеңілдікті автонесие басталғаннан бері Cobalt сұранысқа ие модельдердің бірі болып тұр.
Екінші орынға Hyundai Elantra жайғасқан, бірақ оның 593 данасы ғана өтті. Үздік үштікті Tucson кроссовері (391) түйіндеді.
«Лада» әлі бұрынғыдай сатылып жатыр, айына 300–400 Granta өтуде. АВТОВАЗ екі ай жұмыс істемегенін ескерсек, көрсеткіш жазда әлдеқайда төмендеуі мүмкін.
Қарапайым жабдықталған және Еуро-2 стандартына сай жасалған седан өндірісі 8 маусымда басталады, бірақ мұндай машина Қазақстан нарығына шықпайды. Осы айда Vesta үздік ондыққа енді, модельдің 213 данасы иесін тапқан.
Мамырда танымал үш седан Toyota Camry, Hyundai Accent және Kia Rio үздіктер қатарынан көрінбеді. Олардың орнын Land Cruiser Prado 150 (256 дана) мен қытайлық JAC J7 (230) басты.
Санкт-Петербургтегі зауыттан Camry мен RAV4 жеткізілмегендіктен, «Тойота» сатылымы айтарлықтай төмендеді. 2021 жылмен (бес ай) салыстырғанда 1855 машина кем сатылды (— 33 %).
2022 жылғы мамыр қорытындысы бойынша нарықтағы үздік 5 марка
| Орын | Марка | 2022 жылы мамырдағы сатылым (дана) |
| 1 | Chevrolet | 2630 |
| 2 | Hyundai | 1752 |
| 3 | Kia | 914 |
| 4 | Lada | 831 |
| 5 | Toyota | 641 |
LX 600 нарыққа шыққаннан кейін Lexus саудасы қыза түсті, мамырда олар 251 машина өткізді.
Ал Infiniti бар болғаны 25 көлік сатты. Бірақ марканың біздің нарықтағы орны нығайып келеді. Мамырда елордада марка стандартына сай жаңа автосалон ашылды. Алғашқы бес айда 194 машина саудалаған бренд көрсеткішін 2021 жылмен (175) салыстырғанда 10 пайызға жақсартты.
Қытайлық көліктер жақсы өтіп жатыр. Клиенттер 297 JAC, 207 Chery алған. Ал «Chery-дің» люкс нұсқасы саналатын EXEED жүз көлік өткізді.
Renault саудасы құлдырап кетті, мамырда 70 автокөлік қана сата алды (былтыр 300 мөлшерінде сататын).
Комментариев: 0