BYD Қазақстанда көлікті жылдам қуаттайтын станция салады

Биыл көктемде Қытайдың BYD концерні тұрақты токпен жұмыс істейтін жаңа типті станциясын таныстырған. Оның ең жоғары қуаты 1500 кВт-қа жетеді, соның арқасында электромобильдің энергия қорын 10-нан 97 %-ға дейін 10 минуттан аз уақытта толтыруға болады. Бірақ мұндай жылдамдыққа 1000 вольттық архитектураға негізделген модельдер ғана қол жеткізе алады. BYD топтамасында ондай машиналар көбейіп келеді.

Көлікті аса жылдам қуаттайтын станциялар Қазақстанда да болады. Оны салуға жол ашатын меморандумға Шанхайда өткен кездесуде жасанды интеллект және цифрлық даму министрі Жаслан Мәдиев пен BYD басшысы қол қойды.

Бекеттер алдымен Алматыда, содан кейін елдегі негізгі көлік дәліздері бойында орналасады. Жоба нақты қашан жүзеге асатыны белгісіз. Бірақ бұған дейін BYD Kazakhstan дистрибуция директоры Антон Кущ Business FM эфирінде 2026 жылы басталуы мүмкін екенін айтқан.

Алдағы жылдары Қазақстанда қуаттау станцияларының желісі көбейеді. 21 шілдеде өткен үкімет отырысында премьер-министр Олжас Бектенов Көлік министрлігіне Өнеркәсіп министрлігімен бірлесіп, электромобиль қуаттайтын станциялар мен жол бойындағы сервисті дамыту үшін халықаралық ірі компаниялармен жұмыс істеуді тапсырған.