Bugatti жаңа қозғалтқышын көрсетті

Bugatti Chiron-ның орнын басатын гиперкардың тұсаукесеріне дайындық жүріп жатыр. Марка төрт турбиналы 8 литрлік W16 архитектурасынан бас тартқанын растайтын моторының алғашқы суретін жариялады. Bugatti оны 2005 жылы Veyron моделі жарық көргеннен бері пайдаланып келеді.

Жаңа қозғалтқыш 16 цилиндрді сақтап қалады, бірақ V тәрізді конфигурацияға ие болады. Жаңа мотор жайлы толық ақпарат жоқ. Мұндай агрегат туралы Bugatti де, Volkswagen AG концерні де бұған дейін еш мәлімет бермеген.

Жаңа іштен жанатын қозғалтқышты британиялық Cosworth жасады деген болжам бар. V16 моторы атмосфералы болуы мүмкін, ал турбоүрлемнің орнын гибрид блок басады. Жаңа өнімге арналған бұл жабдықты жақында Bugatti-мен серіктес атанған Rimac компаниясының мамандары дайындап жатыр.

Бұған дейін Bugatti ықтимал клиенттеріне жаңа өнімін көрсеткені белгілі болған. Биыл маусымға жоспарланған тұсаукесер өтпей тұрып біршама көлік сатылып кетті. Бірақ машина клиенттердің қолына 2026 жылы ғана тиеді.