Bugatti Bolide гиперкарының интерьерін көрсетті

Bugatti сериялы Bolide-тің салонын көрсетті. Машина Chiron платформасына негізделгенмен, интерьері «Широн» салонына мүлде ұқсамайды. Марка Bolide үшін арнайы рөл, өзгеше кресло және жаңа интерфейс дайындаған. Бағасы 4 млн еуродан басталады.

Интерьер дизайны X мотивіне негізделген. Көрер көзге гиперкар салоны шанақ дизайнымен сәйкес келіп тұр. Жарыс прототипі стиліндегі ерекше штурвалын бейнеойын индустриясынан алған технологияны қолдана отырып жасапты.

Bolide-те әдеттегідей медиажүйе жоқ. Гиперкарда рөлдің артында қарапайым үш дисплей орналасқан, олар техникалық ақпарат қана береді. Деректі көрсетудің екі нұсқасы (кәсіби шабандозға арналған және әуесқой жүргізушіге арналған) бар.

1 / 8

• 
• 
• 
• 
• 
• 
• 
• 

1 / 8

Карбон орындықтар бірнеше элементтен тұрады. Бүйірлік тіреуіш пен бас тіреуіш элементтерін есік панеліне бекіткен, машинаға мініп-түскенде қолайлы болу үшін олар есікпен бірге жиналады. Bugatti дене өлшемі әртүрлі клиенттерге арнап кресло өлшемінің төрт нұсқасын ұсынып отыр.

Гиперкар салоны климат-бақылау жүйесімен жабдықталған, шеберлер желдету жүйесін ортаңғы консоль маңындағы төрт құбыр түрінде жасапты, бұл Bolide-тің газ шығару жүйесін еске салады.

Гиперкар қазіргі Chiron платформасына негізделген соңғы Bugatti моделі болады. Bolide фирмалық W16 моторымен жүреді, 2020 жылғы концептіде сегіз литрлік қозғалтқыш 1850 ат күшін беретін, сериялы түрленімде оның қуаты 1600 күшке дейін қысқарды. Динамикасы жайлы ақпарат жоқ, концепт алғашқы жүздікті 2.17 секундта еңсереді деген болжам бар, ал ең жоғары жылдамдығы 500 шақырымға жетеді. Мұндай машинаның 40 данасы ғана шығады, оның бәрі сатылып кетті.