Le Soir газеті 2021 жылдың 1 қаңтарынан бастап Брюссельде ең жоғарғы жылдамдық 30 километрге дейін шектелетінін хабарлады. Қазіргі уақытта аумағы 161 шаршы шақырымды құрайтын, ал тұрғындарының саны миллионнан асатын агломерацияда жылдамдық сағатына 50 шақырымға дейін шектелген, бірақ кейбір аудандарда жетпіспен жүруге болады. 2021 жылдан бастап Бельгия астанасының кейбір аудандарында алғашқы шектеуді қалдырып, соңғысынан мүлде бас тарту жоспарланып отыр.
Брюссельдің мобильділік мәселелері бойынша жаңа министрі Эльке ван ден Брандт бұл шараның қала көшелеріндегі апат санын азайтуға бағытталғанын мәлімдеді. Одан бөлек, шектелген жылдамдықты қатаң сақтау көлік қозғалысын анағұрлым үйлесімді етеді.
Бельгия полициясы жүргізушілердің жаңа ережені сақтауын қатаң қадағалайды. Нақтырақ айтсақ, жылдамдық радарлары жаңартылып, саны да артады. Сонымен қатар айыппұлды өңдейтін қызметкерлер де екі есе көбейеді деп жсопарлануда.
Жалпы тенденциялар ағымына ілескен көрші Нидерланды да тас жолдардағы жылдамдықты шектемек, бірақ оған себеп басқа. 2020 жылдан бастап автомагистральдағы жылдамдық сағатына 100 шақырымға дейін шектеледі, бұл ауадағы азот оксидінің деңгейін төмендету мақсатында қолға алынатын шара. Десе де, бұл шектеу тек күндіз өз күшінде болады, ал кешкі 19:00-ден таңғы алтыға дейін жүргізушілердің 130 км/сағ жылдамдықпен жүйткуге мүмкіндігі бар.
Комментариев: 0