КОКП ОК-нің Бас хатшысы Леонид Брежневке 1976 жылдың 10 желтоқсанында сол кезде ІІМ-н басқарған Николай Щёлоков өз қолымен табыстаған жүргізуші куәлігі 14 қараша күні Мәскеуде бәс саудаға түседі. Құжат шамамен 1.35-1.5 млн рубль сомасына сатылады деп болжанып отыр.
«Литфонд» аукцион үйінің лотқа берген түсіндірмесінде «ААК 000077 жүргізуші куәлігі». Тамаша жағдайда. «Құжат иесіне барлық категориядағы көлік құралын басқаруға құқық берілген», — деп жазылған. Куәлікпен бірге жүргізушінің ереже бұзғаны туралы дерек тіркелмеген ескерту талоны да беріледі.
Құжат тапсырушының айтуынша, бұл куәлік Брежневтің туған күніне әріптестері берген сыйлық болып табылады, себебі КСРО басшысына оның қажеті болмаған. Жиырма жылдан астам уақыт бойы құжат Брежневтің саяжайында сақталған, ал 1991 жылдан кейін, яғни саяжай Мәскеу мэры Гавриил Поповтың иелігіне өткен кезде Брежневтің заттары мен құжаттары нарық игілігіне айналды.
Осы жаңалықпен қатар 1973 жылы Кэмп-Дэвид маңайында бас хатшы тізгіндеген «линкольннің» жолаушысы болған АҚШ президенті Ричард Никсонның «Брежнев Мәскеудің орталық көшелерімен кедергісіз жүйткіп үйренген, ал мен Құпия қызметтің не теңіз әскерлерінің көлігі біржақты бағыттағы көшенің бір бұрышынан кенет шыға келсе не боларын тек елестете алатынмын», — деген сөзі еріксіз ойға оралады. Оның айтуынша, Брежнев бұралаң жолмен сағатына 80 км жылдамдықпен жүйткіп, дәл сондай жылдамдықта бұрылыстардан көлікті сырғыта өтеді екен.
Комментариев: 0