33 жастағы азамат BMW, Mercedes-Benz, Toyota сынды танымал маркалардың қосалқы бөлшектерін ұсынған. Оңтүстік астананың Полиция департаментінің баспасөз қызметі хабарлағандай, қылмыскер адамдарды тарту үшін нарықтан төмен баға белгілеп, бөлшекті өзге аймақтарға да жіберуге уәде беріпті. Сатып алушы хабарласқанда алаяқ клиенттен кепілақы сұрап, оны бөтен адамның атына тіркелген картаға жіберуді талап етеді. Алайда, ақша қолына түскен «сатушы» бірден абоненттік нөмірін ауыстырып, хабарландыруды өшірген, ал біраз уақыт өткен соң басқа нөмірмен жаңа хабарландыру беріп отырған.
Осылайша, қаскөй кемі он адамды алдап соқты. Ол AntiFraud жедел профилактикалық шарасын өткізу барысында ұсталды. Белгілі болғандай, ер адам бұрын да осыған ұқсас қылмысы үшін істі болған екен. Қазіргі уақытта ҚР ҚК-нің 190-бабының 2-бөлігі (Алаяқтық, яғни бөтеннің мүлкін жымқыру немесе алдау немесе сенімді теріс пайдалану жолымен бөтен мүлiкке құқықты иемдену) бойынша сотқа дейінгі тергеу жұмыстары жүргізіліп жатыр.
Егер кінәсі дәлелденсе, күдікті 4 000 АЕК мөлшерінде айыппұл арқалайды не төрт жылға дейін бас бостандығы шектеледі не дәл сол мерзімге бас бостандығынан айырылады.
Алаяқтардың бір тынбай, сізді торына түсірудің алуан түрлі құйтырқы тәсілдерін ойлап тауып жатқанын ескерткіміз келеді. Алдын ала төлем жасау арқылы ақшадан да, тауардан да қағылып, сан соғып қалуыңыз ғажап емес.
Комментариев: 0