Кроссовердің үшінші буыны сырттай кішірейген X5 сияқты көрінеді. Бірақ қазіргі модельмен салыстырғанда көлемінде біршама өзгеріс бар: 4400 (+43) х 1844 (+23) х 1640 (+43) мм. Солтүстік Америка нарығына шығатын барлық X1-ге 2 литрлік 4 цилиндрлі турбомотор қойылады. 7 сатылы автоматпен жұмыс істейтін агрегат 245 ат күшіне (400 Нм) ие, бұл көліктің алғашқы жүздікті 6.2 секундта алуына мүмкіндік береді. Мұхиттың арғы жағында тек толық жетекті (xDrive) модель сатылады. Алдыңғы жетекті нұсқасы мүлде болмайды.
Еуропа тұрғындары үшін марка батареялы iX1 xDrive30 шығарады. Бұл BMW-ның шағын премиум сегментіндегі алғашқы толық жетекті электромобилі. Ол жалпы 313 ат күшін (494 Нм) беретін екі электромотор арқылы қозғалады. Максимал жылдамдығы 180 шақырымға жететін машина алғашқы жүздікті 5.7 секундта алады. Сыйымдылығы 64.7 кВт·сағ болатын аккумулятормен жүріс қоры 413-438 шақырымға жетеді.
Қарт құрлықта Х1 бірнеше гибрид мотормен сатылады. Бензинді sDrive18i, xDrive23i, xDrive25e, xDrive30e 136-дан 326-ға дейінгі күшке ие болса, дизельді xDrive18 бен xDrive23d 150 және 197 ат күшін береді.
Шанақ палитрасы Blue Bay Lagoon, Cape York Green, Utah Orange, Space Silver және BMW Individual Frozen Pure Grey түстерімен толықты. Машинаға зауыт мамандары 18 дюймдік дөңгелек орнатады, бірақ 19 және 20 дюймдік дөңгелектер де қолжетімді.
Салондағы аспаптар панелі мультимедиа экранымен біріккен. Желдеткіш дефлекторлары алдыңғы бөлікте, әр жерде тұр, рөл батырмаларын сақтап қалған, ал трансмиссия режимін ауыстыратын иінтірек кәдімгідей жіңішкерген.
Көмекшілер тізімінде дауыспен басқарылатын Alexa мен смартфондағы мобильді қосымша арқылы алыста тұрған көліктің жағдайын қадағалауға мүмкіндік беретін бейнебақылау жүйесі бар. Телефон қуаттайтын қуыс көлбеу орналасқан, бірақ қатты фиксатор кейде смартфонды алуға кедергі келтіре ме деген күдік бар.
Жаңа BMW X1 күзде сатылымға шығады. АҚШ-та ең арзаны 38 600 доллар тұрады.
Комментариев: 0