BMW жаңа электрокарын қыркүйекте көрсетеді

Компания батареялы Neue Klasse топтамасындағы алғашқы сериялық көлігі — iX3 кроссоверін шығарады. X3-ке негізделген машинаның ресми премьерасы қыркүйекте Мюнхендегі көрмеде өтеді. Бренд бұл туралы 2024 жылдың қорытындысы мен болашақ жоспарына арналған конференция барысында хабарлады.

Қазір кроссовердің прототиптері Оңтүстік Африканың ыстық климатында сынақтан өтіп жатыр. Концерн басшысы Оливер Ципсе батареялы бес есікті көлік түбегейлі өзгерген платформаға, жаңа жобалау тәсіліне және толығымен жаңарған дизайнға қарамастан, дәстүрлі BMW болып қалатынын айтты.

BMW iX3 Венгрияның Дебрецен қаласындағы зауытта 2025 жылдың аяғына таман жасала бастайды. Компания 2026 жылы кроссовермен платформалас седанды сұйық отын тұтынатын 3-сериялы модельге балама ретінде ұсынады. Ол i3 индексін алуы мүмкін.

Neue Klasse жобасы — BMW-ның даму стратегиясындағы негізгі кезеңдердің бірі. Ол екі жаңа электромобильмен шектелмейді. Технологиялар мен дизайн ерекшеліктері болашақта шығатын барлық жаңа өнімге қолданылады.

Мұндай өзгеріс табыс деңгейін қалпына келтіруге көмектесуі керек. 2024 жылдың қорытындысы бойынша BMW-ның таза пайдасы үштен бірге қысқарды. Оливер Ципсе концерн биылдан бастап шығынды азайтып, сауданы арттырады деді.