BMW мен Toyota қайтадан күш біріктіреді

BMW мен Toyota концерндері ортақ жоба аясында бірікпекші. Бұл жолы компаниялар жаңа модельдер әзірлеумен немесе сутекті отынмен жүретін машинаны жақсартумен айналыспайды. Дегенмен қазіргі жоба жаңа энергия көзімен байланысты.

Келесі алты ай екі автоконцерннің мамандары Испанияда синтетикалық, яғни жаңа отын тұтынатын автомобильдерді сынақтан өткізеді. Оған сериялық көліктер қатысады, мамандар Repsol-дың Nexa 95 жанармайын құяды.

Nexa 95 жанармайы компанияның Испаниядағы 30 жанармай бекетінде бар. 2026 жылдың аяғында олардың саны 600-ге жетеді. Синтетикалық АИ-95-тің құрамы туралы ақпарат жоқ, бірақ Repsol өкілдері мұндай бензин CO₂ шығарындысын 70 %-ға дейін азайтады деді.

Тәжірибеге Bosch та қатысады. Оның мамандары мен жүйелері отынның жанармай станциясына жеткізілген күннен бастап бүкіл өмірлік циклін бақылайды және машинаны күнделікті пайдаланғандағы отын шығыны мен шығарынды деңгейін тіркеп отырады.

Бұл сынақтардың басты мақсаты — синтетикалық отынды тұтыну көлік жүйесінің қоршаған ортаға әсерін қаншалықты төмендете алатынын анықтауға мүмкіндік беретін деректерді жинау.

Жобаға қатысушылар жаңа бензин электрлі күштік құрылымға жақсы балама бола алады деп ойлайды. Toyota мен BMW, сондай-ақ Porsche секілді автоөндірушілер бірнеше жылдан бері автомобиль қозғалтқышын дамытудың жаңа бағытын, соның ішінде жаңа бензинді және сутекті пайдаланудың түрлі тәсілдерін зерттеп келеді.