Америкалық NHTSA мамандары BMW көліктерінің кері қайтарылып жатқанын хабарлады. Тас жолдағы қозғалыс қауіпсіздігін қадағалау ұлттық басқармасының деректеріне сүйенсек, кампания 257 мыңнан аса көлікті қамтиды. Оның қатарында BMW-ның 2018 жылдан қазіргі уақытқа дейін шығарылып келген үшінші, бесінші, жетінші және сегізінші сериясын қоса алғанда, бүкіл дерлік модельдік қатары мен X3, X4, X5, X6, X7 кроссоверлері, Z4 родстері, Rolls-Royce Phantom мен Cullinan және жаңа Toyota Supra бар.
Мәселе артқы көрініске арналған камерада, нақтырақ айтсақ оның баптауларында болып тұр. Көлік иелері жарық пен контрастылық баптауларын дисплейде мүлде ештеңе көрінбейтіндей деңгейге дейін өзгерте алады. Бұл жағдайда ол автоматты түрде қайта түзелмейді. Мұндай кемшілік Американың федералдық стандарттарына сай келмейді.
Кері қайтару кампаниясының тізіміне іліккен көлік иелеріне мәселе туралы ескертіліп, олар сервиске шақыртылады. Онда мамандар мультимедиалық кешенді тегін қайта баптап береді.
Комментариев: 0