Биыл электромобильге квота берілмейді

Комиссия биыл кедендік рәсімдеусіз және ҚҚС төлемей жеке пайдалану үшін 15 мың электрокар әкелуге рұқсат берген, бірақ қазанның ортасында квота бітіп қалды. Импорттаушылар мен брокерлер шекарада қалып қойған мыңға жуық автомобильді жеңілдікпен рәсімдеп үлгермегенін айтты. Қарашаның аяғында «Нұр жолы» өткізу пунктіндегі уақытша сақтау қоймасында тұрған техника саны 50-ден аспады. Дегенмен Алматы мен басқа қалаларда қанша көлік тұрғаны белгісіз.

ЕАЭО елдері ЕЭК Комиссиясына 2025 жылға қосымша квота беру және келер жылы жеке тұлғаға арналған жеңілдік мерзімін ұзарту туралы ұсыныс жолдады.

ЕАЭО елдерінің премьер-министрлері бұл мәселені 11 желтоқсанда Еуразиялық үкіметаралық кеңесте талқылады. Жиын барысында бес елдің ешқайсысы квота арқылы рәсімдеп үлгермеген көліктердің тізімін ұсынбапты. Биыл жеңілдік мерзімі ұзармайды. Комиссия 2026 жылы Қазақстанға жаңа квота беру мәселесін қаңтарда өтетін келесі отырыста қарайды.

Көлік жеткізгендер оны жеңілдіксіз рәсімдеуге тиіс. Электромобиль ЕАЭО-ға кіретін елдерге экспортталмаса, баж салығы сұралмайтынын еске саламыз. Импорттаушылар тек кедендік рәсімдеу үшін 6 АЕК және 12 % ҚҚС төлеуі керек. 2026 жылғы 1 қаңтардан кейін 16 % болады. Утиль алым төлемейді. Алғашқы тіркеу ақысы автомобильдің шыққан жылына қарай 0.25-250 АЕК аралығында.

12.12.2025 ж. 11:30-да қосылған мәлімет:

ЕЭК-тің ресми сайтында 11 желтоқсанда Үкіметаралық кеңес 2026 жылы Беларуське кіретін 20 мың электромобильді (Еуразиялық экономикалық одақтың сыртқы экономикалық қызметі тауар номенклатурасының 8703 80 000 3 коды), Армения мен Қырғызстанға импортталатын әр 15 мың электромобиль мен гибридті (Еуразиялық экономикалық одақтың сыртқы экономикалық қызметі тауар номенклатурасының 8703 80 000 5 коды) кедендік рәсімдеуден өткізуге жеңілдік беретіні жазылған.

«Армения, Беларусь және Қырғызстанда тұрақты тұратын азаматтар ғана кедендік баж салығын төлемейді. Электромобильді иелік ету, пайдалану және тапсыру құқығын Қазақстан немесе Ресей азаматына және (немесе) онда тұрақты тұратын тұлғаға беруге болмайды. Тізбекті гибридті Беларусь азаматына және (немесе) онда тұрақты тұратын адамға табыстауға рұқсат жоқ», — деп түсіндірді Еуразиялық экономикалық комиссия.