Жол ережесіне өзгеріс енгізу туралы бұйрық 30 сәуірде жарияланды. Оның бір бөлігі — 11 мамырда, екінші бөлігі 12 шілдеде күшіне енеді. Шын мәнінде полицейлер Жол ережесінде техникалық сипаттағы түзету ғана енгізіпті: арнайы жарық шамдарды пайдалану туралы бөлігін толықтырып, 2.6 басымдық белгісінің атауын «Қарсы қозғалыстың артықшылығы» деп өзгерткен. Ал қоғам күткен электросамокат қозғалысын реттейтін норма бұрынғы қалпында қалыпты. Онда былай деп жазылған:
«168-1. Электросамокат жүргізушісі веложол немесе веложолақпен жүреді. Веложол немесе веложолақ болмаса самокатшы:
- осы баптың екінші тармағына сай жолдың оң жақ шетімен, автобус жолағы болса, соның оң жағымен және бір қатарда;
- жол жиегімен;
- адамдарға қауіп төндірмей, сағатына 6 км-ден аспайтын жылдамдықпен тротуар немесе жаяу жүргіншілер жолағымен жүруге тиіс.
Жолдың жүріс бөлігінің оң жақ шетімен, оның ішінде қоғамдық көлікке арналған жолақпен 18 жасқа толмаған және кез келген санаттағы жүргізуші куәлігі (немесе жүргізуші куәлігінің орнына берілген уақытша куәлігі) жоқ самокатшы қозғала алмайды».
Kolesa.kz редакциясына полицейлер түсіндіргендей, ресми ресурстарда жарияланған және қолданыстағы Жол ережесіндегі бір ғана грамматикалық қате түзетілген. Ал бұған дейін жарияланған электросамокаттң тротуармен жүруіне тыйым салатын норма алдымен ҚР «Жол қозғалысы туралы» заңына енуі керек. Жол ережесіндегі самокатқа қатысты тармақ содан кейін ғана ауысады.
Демек қазірше самокатшылар үшін ештеңе өзгерген жоқ.
Ал самокат жүргізгісі келетін азаматтар нені білгені жөн, бұл туралы арнайы мақала жазғанбыз.
Комментариев: 0