Билік «конструктор»-көлік заңдастыруға рұқсат берді

Қазақстан шетелдік машиналарды тіркеудің тағы бір сатысына өтті. Primeminister.kz порталы елге 2022 жылдың 1 қыркүйегіне дейін кірген, ресми тіркеу құжаты жоқ «конструктор»-көліктерді есепке қоюға мүмкіндік беретін үкімет қаулысы шыққанын хабарлады. ІІМ Қазақстанда сондай 14 мың машина барын анықтапты.

Оны тіркеу үшін 200 мың теңге төлеу қажет.

Көлігін заңдастыру үшін иесі мына құжаттарды өткізуі керек:

• өтініш;
• ішкі істер органының уәкілетті қызметкері берген көлік құралын тексеру актісі;
• техникалық тексерістің диагностикалық картасы.

Өтінішті ресми eGov сервистері арқылы да, екінші деңгейлі банктердің мобильді қосымшасы арқылы да беруге болады.

Маңызды: «конструктор»-көлікті есепке қойған соң оны кейін қайта тіркеу мүмкін емес. Көлік құралын тіркеу туралы куәлікте меншік құқығын өзгертуге тыйым салатын мәлімет болады. Мұндай машинамен ел аумағынан шығуға да рұқсат жоқ.