Бірінші сәуір күлкі күнін кей тұрғын ерте тойлап қойған сияқты. Олар әлеуметтік желіде мынадай мәлімет таратты:
«Бірінші сәуірде Қазақстанда бензин мен дизель бағасы өседі. АИ-92 маркалы бензин литріне 6–7 теңге, дизель отыны 12–14 теңге қымбаттайды. Бұл Энергетика министрлігінің биыл жыл басынан бергі елдегі жанармай нарығын реттеу туралы үшінші бұйрығы».
Елге ескерту жасағысы келген әлеуметтік желі әкімшілері қазір қолданыстағы заңмен дұрыс таныспай, Энергетика министрлігі дайындаған жанармайдың шекті көтерме бағасын белгілеу туралы бұйрық жобасына «алданып» қалған сияқты.
Біріншіден, бұл құжат 1 сәуірден бастап күшіне енбейді. Қазірше жоба ғана. Екіншіден, құжатта мұнай өнімдерін көтерме саудаға шығарғандағы шекті баға (ҚҚС-ын қоса есептегенде) көрсетілген:
- АИ-80 маркалы бензин — тоннасы 93 161 теңге (литрі 70 теңге);
- АИ-92 және АИ-93 — тоннасы 193 649 теңге (литрі 146 теңге);
- дизель отыны (жазғы, маусымаралық) — тоннасы 236 156 теңге (литрі 198 теңге).
Яғни, жанармай құю бекеттеріндегі қазіргі бағадан жоғары емес.
Үшіншіден, Энергетика министрлігінің жанармайға шекті баға белгілеу туралы бұйрығы өзгерген жоқ, оның үстіне қазіргі шекті баға ұзақ уақыт сақталады. Қазір жанармай құю бекеттері дизельді Қазақстан азаматына 230–260 теңгеден, шетелдіктерге 450 теңгеден шекті мөлшерде (тәулігіне жеңіл машинаға — 100 литр, жүк көлігі, автобус, арнайы техникаға — 300 литр) сатуға міндетті. Бекеттер Аи-80 маркалы бензиннің литрін 89 теңгеден сатады. Ал 92 және 93-бензиннің бағасы Қостанай мен Солтүстік Қазақстан облысында — 187 теңге, Астана, Алматы және Шымкент қаласында, Ақмола, Ақтөбе, Шығыс Қазақстан, Батыс Қазақстан, Алматы, Атырау, Жамбыл, Қарағанды, Қызылорда, Павлодар, Түркістан, Маңғыстау, Абай, Жетісу, Ұлытау облысында — 182 теңге.
Комментариев: 0