Біраз уақыт бұрын әлеуметтік желіде Мұнайлы ауданына қарасты Баянды ауылында түсірілген видео тарады. Одан жергілікті тұрғындардың жаңа төселген асфальтты қолмен жұлып жатқанын көруге болады. Кейін жақын маңдағы тағы бірнеше ауылға сапасы дәл сондай жол салынғаны туралы ақпарат шықты.
Облыстық әкімдік Мұнайлы және Түпқараған аудандарында орналасқан бірнеше елді мекендегі жаңа жол төсемін сараптамаға жіберген, сарапшылар құрылыс нормалары мен ережелері және сапа стандарты толық сақталған деген қорытынды шығарды.
Шенділер бейнежазбадағы асфальт кесегі ені бес метрлік негізгі жолға тиесілі емес деп мәлімдеді. Олардың сөзінше, құрылысшылар жол жиегін жасау үшін қосымша асфальт төсеген, ал жолдың өзі талапқа толық сай келеді және мұны зертханалық тексеріс нәтижесі растайды. Видеодан жаңа асфальттың үй қоршауын жағалай төселгені аңғарылады. Әкімдік түсіндіргендей, қоршаудан бес метр қашықтыққа талапқа сай жол төселеді, ал оған жапсарласа топырақ үстіне жол жиегі мен жүргін бөлікті бөлместен асфальт төселеді. Бұл қызық екен! Мемлекеттік стандартта жол жиегін жасау әдісі өзгеше жазылған.
Дегенмен, әкімдік бұл жолды қосымша тәуелсіз сараптамадан өткізуге уәде берді. Қандай да бір кемшілік анықталған жағдайда, мердігерге ақша төленбейді. Ал жол жөндеумен айналысып жатқан компания жолдың барлық талапқа сай екендігі анықталса, жалған ақпарат таратқандарды сотқа беретінін хабарлады.
Комментариев: 0