Алматы облысы ТЖД-нің баспасөз қызметі хабарлағандай, 19 қаңтар күні Toyota Land Cruiser Prado жол талғамайтын көлігін тізгіндеген Алматының үш тұрғыны Жамбыл ауданындағы Үлкен ауылында орналасқан «Якорь» деп аталатын демалыс базасына балық аулауға кетіпті. Дәл сол күні Балқаш көліне аттанған олар жағадан бір шақырымдай жердегі мұз бетіне тоқтаған.
Ер адамдар мұнда шатыр тігіп, балық аулай бастапты. Кешке қарай олардың екеуі демалыс базасына барып келмек болып, қараңғыда адасып кетеді. Жағадан оңтүстік-батысқа қарай шамамен бір шақырымдай жерде темір тұлпар мұз астына түсе бастаған.
Балықшылардың бірі өз күшімен су бетіне шығып, екіншісіне көмектеспек болғанымен, ештеңе шықпапты. Нәтижесінде ер адам суға батып кетті, — деп хабарлады ТЖД мамандары.
Оқиға орнына Қапшағай аймағының жедел құтқару тобының сүңгуірлері аттанған. Қаза тапқан адамның денесі тек екі күннен кейін ғана Балқаштың түбінен табылды. Жергілікті тұрғындар мен Үлкен ауылының әкімдігі көлікті судан шығару жұмыстарымен айналысуда.
Осы орайда, күн суысымен бетіне мұз қатқан өзен-көлдермен жүру арқылы жол қысқартпақ болғандардың көліктерінің жыл сайын су астына кетіп жатқанын естеріңізге сала кетейік. Орны толмас өкінішке әкеп соқтыратын қателікке жол бермес үшін сақтық танытып, абай болыңыздар.
Комментариев: 0