Келеңсіз оқиға таңғы 7 шамасында Нұр-Сұлтандағы Жетіген көшесінде болды. ҚР ІІМ-нің баспасөз қызметі хабарлағандай, автобус жүргізушісі қоғамдық көлікті белгісіз біреудің айдап кеткенін хабарлаған. Жүргізушінің айтуынша, ол 12 метрлік MAN-ды қыздырмақ болып, оталдырады да, бір-екі минутқа диспетчерлік бөлімге кіріп кетеді. Шықса — автобус жоқ.
Қылмыскер бейнебақылау камераларының көмегімен табылды. Сағат 7:18-де автобус Республика даңғылы мен Дүкенұлы көшесінің қиылысынан байқалған. Ол жаққа бірден аттанған патрульдік жасақ 28 жастағы елорда тұрғынын құрықтады. Белгілі болғандай, ер адам сол сәтте алкогольдік мас күйде болған. Аталған дерек бойынша ҚР ҚК-нің 200-бабының 1-бөлігіне сай сотқа дейінгі тергеу жұмыстары жүріп жатыр. Кінәсі дәлелденсе күдікті 1 000 АЕК көлемінде айыппұл арқалауы не түзету жұмыстарына тартылуы, не болмаса екі жылға дейін бас бостандығынан айырылуы мүмкін.
Комментариев: 0