— 2018 жылдың 1 қазанындағы жағдайға сай, ел бойынша көлік құралдары үшін жеке тұлғалардан өндірілетін салықты төлемеген 734 059 адамның жалпы қарызы 18.9 млрд теңге сомасын құрайды, — деп мәлімдеді баспасөз конференциясында ҚР ҚМ МКК-нің Берешектермен жұмыс жасау басқармасының басшысы Айнұр Құлшықова. Бұл ретте, 80 мың астаналық көлік иесі 2.5 млрд теңгені (республика бойынша жалпы қарыздың 13 %-і) ел қазынасына қайтаруы тиіс екен.
А.Құлшықова, сонымен қатар, МКК қызметкерлерінің Астана полицейлерімен бірлесе отырып, жол ережесін бұзғандардың салық бойынша берешектерінің бар-жоғы тексерілетін рейд жұмыстарының жүргізілетінін баса айтты. Іс-шаралар «Сергек» кешендерінің мүмкіндіктерін пайдалану арқылы жүзеге асатын болады. Борышкерлер жайлы мәліметті мемлекеттік кірістер комитеті инвестициялар және даму басқармасына жібереді, ал онда салықтан жалтарғандардың деректер базасы жасалады. Аталған базадағы деректерге Астана қалалық ІІД жол-патрульдік полициясының планшеттерінің көмегімен қол жеткізуге болады. Борышкерлерге салық 30 күн ішінде төленуі тиіс деген ескертпе беріледі. Ал төлемеген жағдайда, олардың ісімен сот орындаушылары айналысатын болады.
Айтпақшы, МКК қызметкерлері рейд барысында тек жол ережесін бұзған көліктердің ғана тоқтатылатынын атап өтті.
Комментариев: 0