Қазақстандағы әрбір екінші жол апаты — жаяу жүргіншілерді басып кету, — деп мәлімдеді ҚР ІІМ ӘПК. Бұл орайда, жыл басынан бері елде жаяу жүргіншілердің кінәсінен болған 540 жол көлік оқиғасы тіркеліпті. Нәтижесінде 115 адам мерт болған, ал 450-ге жуық адам түрлі дәрежедегі жарақаттар алыпты. Жол апатынан өз кінәсінен қаза тапқан жаяу жүргіншілер саны былтырғы жылмен салыстырғанда Алматыда 300 %-ке, Қарағанды облысында 133 %-ке, ал Алматы облысында 37 %-ке артқан екен. Дөңгелек астына түсіп опат болудың негізгі себептері — жолды белгіленбеген жерде не бағдаршамның қызыл түсі жанып тұрған сәтте кесіп өту.
Тәртіп сақшылары қазір жауын-шашынды ауа райы мен көктайғақ кезінде жол ережесін бұзудың қаупі аса жоғары екендігін баса айтты, себебі, мұндайда автокөліктің тежелу жолы ұзара түседі де, жол апатынан құтылу іс жүзінде мүмкін емес болады. Мұны жол қозғалысына қатысушылардың барлығы, яғни көлік жүргізушілері де, жаяу жүргіншілер де естен шығармауға тиіс!
Сондай-ақ, комитетте жол ережесін бұзған жаяу жүргіншілерге салынатын айыппұл 2 АЕК көлемінде екендігін де атап өтті. Әлеуметтік желілерде тарап кеткен, бұл үшін 70 мың теңге, тіпті одан да көп төлейді екен деген ақпараттардың бәрі жалған.
ҚР БП Құқықтық статистика комитетінің деректеріне сүйенсек: 2018 жылдың 9 айында Қазақстанда жаяу жүргіншілердің қатысуымен болған 4 903 жол апаты тіркеліпті. Онда қаза тапқандар саны 493, және 4 701 адам жарақат алған. 3 915 жағдайда жаяу жүргіншіні қаққан жүргізушілер мас болмаған. Бұл ретте 2 218 жол апаты Алматыда орын алған екен.
Комментариев: 0