2020 жылға дейін республикада 4600 шақырымды құрайтын заманауи жолдар салынатынын «Хабар 24» арнасы хабарлады. Осы мақсатта 2018 жылы жергілікті маңызға ие жолдар құрылысын қаржыландыру 150 миллиард теңгеге дейін арттырылған. Осы ретте, автопарк өкілдері ірі қалалардағы жолдардың қазіргі таңда Еуропалық жолдардан кем түспейтінін айтады.
«Президенттің соңғы жолдауында халықтың өмір сүру сапасын арттыруға көп көңіл бөлінген. Қоғамдық көлік, негізінен, жолаушылардың жеңілдікке ие категориясына қызмет етеді, бұл студенттер, оқушылар, зейнеткерлер. Осы жылдан бастап жолаушылар тасымалдайтын көліктер үшін ауқымды субсидиялар бөлінуде. Әрі сіздер Алматыдағы автобустардың 85-90 пайызының жаңа екенін көріп жүрсіздер. Сол себепті де біз жігерліміз, және әрі қарай үш еселенген жігермен жұмыс жасайтын боламыз», — деп мәлімдеді автопарк директоры Бекежан Тыныштықбай.
Естеріңізге сала кетейік, 2017-2018 жылдарға арналған бәсекеге қабілеттілік рейтингінде Қазақстан жол сапасы бойынша 115-орынды иеленген еді. Тіпті Гондурастың жолдары да біздікінен жақсы болып шықты. Соған қарағанда, автопарк өкілдері шетке көз қиығын да салмастан, тек ірі қалалардың орталық көшелерімен ғана жүретін сияқты.
Комментариев: 0