2018 жылдың алғашқы жарты жылдығында ІІМ-не біздің отандастарымыз газ баллонды қондырғы орнатылған (барлық тіркелгендердің 15.9 %-і) 89 592 автокөлікті есепке қойған. Бұл 2017 жылдың осыған ұқсас көрсеткіштерінен 44.5 %-ке көп. Көш бастағандар тізімінде — газ бағасы ең төмен өңірлер: Маңғыстау облысы (19 525 тіркелген), халық тығыз қоныстанған, қазір Түркістан облысы деп аталатын ОҚО мен Шымкент қаласы (13 875), Ақтөбе облысы (11 383) және Астана (6031).
Бұған қоса, зерттеу нәтижелері көрсеткендей, қазақстандықтар көгілдір отынға көбіне үш жастан жоғары техниканы ауыстырады екен. Газ баллонды қондырғы орнатылған ең танымал автокөліктер ретінде Toyota Camry, Daewoo Nexia, Opel Vectra танылды. Газ баллонды қондырғы орнатылған ең танымал коммерциялық көліктер — ГАЗ «Газель», УАЗ-3909 және ГАЗ-53. 2018 жылдың алғашқы алты айында тіркелген газ баллонды қондырғысы бар автокөліктердің басым бөлігі жеке тұлғаларға тиесілі (84 600), ал заңды тұлғалардың үлесіне тіркелгендердің 5.5 %-і (4 932) тиген, — деп хабарлады Қазақстандық автобизнес Ассоциациясының баспасөз қызметі.
Комментариев: 0