ҚР ІІМ Әкімшілік полиция комитетінің жобасына сәйкес ережеде көлік құралын бұрынғы иесінің нөмірімен (егер қымбат нөмір болмаса) тіркеуге рұқсат ететін жаңа тармақтар қосылады. Бірақ нөмірлік белгінің цифрлы коды жеке тұлғаның мекенжайына немесе заңды тұлғаның заңды тіркелген жеріне сәйкес келуі керек. Мысалы, Алматы тұрғыны Қарағандыдан көлік сатып алса, оған тағылған 09 индексті нөмірді қалдыруға болмайды.
Жоғарыда аталған тармақтарға сүйенсек, ел тұрғындары автомобильді қымбат нөмірімен бірге сатып ала алмайды. VIP-нөмірді беруге болатын тұлғалар:
- мемлекеттік мекемелер, елшіліктер, халықаралық ұйымдар, дипломаттар, елшілік қызметкерлері мен олардың отбасы;
- бұрынғы иесінің ата-анасы, балалары, заңды некедегі әйелі/күйеуі;
- көлік мұра бойынша берілген болса иесінің мұрагері.
Жаңа жүргізуші «қымбат нөмірді» бұрынғы иесінің өтініші, сонымен қатар растайтын құжаттар (неке туралы куәлік, туу туралы куәлік, мұрагерлік құқығын растайтын куәлік) ұсынғаннан кейін ғана алады. Нөмірді алған адам 9660 теңге (2.8 АЕК) баж салығын төлейді.
Көлік иесі автомобильді ғана сатып, нөмірін алып қалатын болса, оны 30 күнге арнайы ХҚКО-да қалдырып кете алады. Ал қарапайым нөмірді бұдан былай арнайы мекемеде сақтауға рұқсат жоқ. Бұл қағиданы тіркеу ережесінен алып тастайды.
Тағы бір маңызды мәлімет бар: жоба авторлары автомобильді тексеруге жіберуге негіз болатын себептер тізімін кеңейтуді ұсынды.
Құжатта көлік құралы мына жағдайларда тексерістен өтеді деп жазылады:
- автомобильді алғаш тіркегенде (ҚР аумағында шыққан немесе ресми дилерлер әкелген жаңа көлікті тіркеуді есептемегенде);
- шанағы, шассиі, рамасы ауысқанда;
- қайта жабдықталғанда;
- көлік құралының түсі өзгергенде;
- маркасын, моделін, сәйкестендіру немесе шасси (шанақ, рама) нөмірін, шыққан жылын, түсін, қозғалтқыш көлемін, қуатын, машинадағы орын санын көрсеткенде қате кетіп, оны түзеу қажет болғанда.
Салыстырғанда міндетті түрде суретке түсіріп, нәтижелерді бірыңғай ақпарат базасына енгізу керек. Есепке полицейлер ЭЦК және биометрия көмегімен қол қояды.
Комментариев: 0